Franska félagið Paris Saint-Germain er eina félagið sem er í viðræðum við brasilíska félagið Palmeiras um vonarstjörnuna Endrick en þetta staðfestir Douglas, faðir leikmannsins, í viðtali við brasilíska miðla.
Endrick Felipe, sem er 16 ára gamall, skrifaði undir sinn fyrsta atvinnumannasamning við Palmeiras á dögunum er hann fagnaði 16 ára afmæli sínu.
Hann er talinn einn efnilegasti leikmaður heims um þessar mundir og eru öll stærstu félög heims áhugasöm.
Endrick er næsta stjarnan sem á að koma frá Brasilíu og því búist við miklu en félög þurfa að greiða að minnsta kosti 52 milljónir punda fyrir hann.
Eina félagið sem er í viðræðum við Palmeiras er Paris Saint-Germain.
„PSG er eina félagið sem hefur opnað viðræður við Palmeiras og komið með staðfest tilboð, eins og staðan er í dag. Það eru mörg félög frá mörgum mismunandi löndum sem hafa áhuga á að fá hann en PSG er búið að taka skrefið,“ sagði Douglas, faðir Endrick við Canal del Nicola.
Athugasemdir
