Frá fréttamannafundinum í dag.
„Við erum að reyna að gera þetta mjög faglega með erlendum aðilum sem hafa mikla reynslu á þessu sviði," sagði Geir Þorsteinsson, formaður KSÍ, eftir að kynntur var samningur við Borgarbrag og Lagardere Sports um að gera formlega hagkvæmisathugun á Laugardalsvelli.
Frá og með 2019 verður undankeppni EM spiluð á einu ári. Fyrstu tveir leikirnir eru þá í mars og síðustu tveir í nóvember. Ísland myndi líklega spila fyrstu tvo leikina úti sem og síðustu tvo eins og staðan er í dag. Geir vill þó ekki sjá það gerast.
„Ég tel að það sé ekki líklegt til árangurs í keppninni. Við þurfum úrbætur á vellinum. Við þurfum lágmarksbreytingar á vellinum. Við þurfum að losna við hlaupabrautina og loka til að enda til að skýla vellinum betur við veðri og vindum. Síðan sjáum við hvort þessi könnun geti leitt að sér enn stærra verkefni, sem væri fjölnota leikvangur sem gæti hýst ýmsa aðra viðburði."
Ekki búið að ræða möguleika á gervigrasi
Geir gæti séð fyrir sér að byggja yfir leikvanginn. „Það væri draumalausnin. Ef leikvangurinn ætti að taka stóra tónleika þá þyrfti að vera þak miðað við veðurfarið á Íslandi. Það er samt ekki víst að það verði niðurstaðan í þessari hagkvæmiskönnun."
Geir segir að ekki hafi verið rætt nánar hvort til greina komi að setja gervigras á Laugardalsvöll.
„Það eru skiptar skoðanir um það og sú umræða hefur ekki verið tekin. Það gæti haft veruleg áhrif ef það kemur þak á völlinn. Ég er gras maður, bestu skilyrði fyrir knattspyrnu er náttúrulegt gras."
20 þúsund manna leikvangur?
Í hagkvæmisathuguninni verður skoðað hvaða aðra starfsemi er möguleiki á að hafa á Laugardalsvelli.
„Það gæti verið áhugi fyrir rekstri á hóteli, veitingastöðum, þjónustu við nærumhverfi með íþróttasölum eða sölum fyrir menntastofnanir. Það eru ýmsir möguleikar sem tengjast líka þessum fjölda ferðamanna með því að stofna hér til viðburða,"
Ljóst er að sætum á Laugardalsvelli mun fjölga umtalsvert ef að leikvangurinn verður endurnýjaður. „Við höfum oft talað um 15 þúsund en núna er maður kannski byrjaður að tala um 20 þúsund því að gengi landsliðsins er gott í dag," sagði Geir.
Hér að ofan má sjá viðtalið í heild sinni.
Athugasemdir
