Stjarnan gerði sex breytingar á byrjunarliðinu eftir tap gegn Blikum í Pepsi-deildinni á miðvikudaginn og var leikurinn í jafnvægi fyrstu mínúturnar.

Thelma Lóa Hermannsdóttir kom Fylki yfir með laglegu skoti eftir tæpar 20 mínútur en við það vaknaði Stjarnan og tók að sækja í sig veðrið.

Thelma Hjaltalín Þrastardóttir jafnaði skömmu eftir opnunarmarkið og gerði Harpa Þorsteinsdóttir tvennu á næstu sex mínútum. Þórdís Hrönn Sigfúsdóttir gerði fjórða markið rétt fyrir leikhlé og var staðan 4-1 þegar lið gengu til búningsklefa.

Stjarnan réði lögum og lofum, hélt áfram að raða inn mörkunum og endaði á að vinna 9-1. Harpa skoraði fjögur.

Stjarnan mætir annað hvort Val eða Breiðablik í úrslitaleiknum. Stjarnan tapaði fyrir ÍBV í úrslitaleiknum í fyrra.