Kóróna veiran veldur nú vandræðum á Ítalíu og hefur orðið til þess að fjölda leikja hefur verið frestað í ítalska boltanum, fjórum leikjum hefur verið frestað í efstu deild í dag.
Inter átti að spila við Sampdoria í kvöld en þeim leik hefur verið frestað. Inter á að taka á móti Ludogorets í 32-liða úrslitum Evrópudeildarinnar á fimmtudaginn.
Forsvarsmenn búlgarska félagsins hafa áhyggjur af stöðu mála á Ítalíu og hafa óskað eftir nánari upplýsingum frá UEFA og Inter um stöðuna sem upp er komin.
„FC Ludogorets hefur sent fyrirspurn á UEFA og Inter vegna stöðu mála í Lombardy héraði á Ítalíu þar sem höfuðborgin Mílanó er. Þar hefur fólk smitast síðustu daga af kóróna veirunni," segir í tilkynningu félagsins.
Um 600 stuðningsmenn búlgörsku meistaranna ætla að styðja sitt lið á San Siro á fimmtudaginn. Inter vann fyrri leik liðanna 0-2 í Búlgaríu.
Athugasemdir
