England: Jafnt í slagnum um Bítlaborgina

Everton og Liverpool áttust við í eina leik dagsins í ensku Ofurdeildinni og tóku heimakonur forystuna fyrir framan rúmlega 20 þúsund áhorfendur á Goodison Park.

Gabrielle George skoraði markið á 27. mínútu en Katie Stengel náði að jafna fyrir leikhlé.

Bæði lið komust nálægt því að skora sigurmark í síðari hálfleik en inn vildi boltinn ekki. Liverpool fékk hættulegri marktækifæri og komst nálægt því að krækja sér í sigurinn í uppbótartíma en Courtney Brosnan var vel á verði á milli stanga heimakvenna.

Liðin eru um miðja deild eftir jafnteflið. Everton er sex stigum fyrir ofan Liverpool en hvorugt lið getur talist vera í raunverulegri fallhættu.