Dzeko er 39 ára gamall og skoraði aðeins tvö mörk í átján leikjum með Fiorentina á fyrri hluta tímabils.

Núna gengur hann til liðs við Schalke sem trónir á toppi næstefstu deildar í Þýskalandi og er í harðri baráttu um að endurheimta sæti í efstu deild eftir þriggja ára fjarveru. Dzeko gerir samning við Schalke sem gildir út keppnistímabilið, en hann fagnar fertugsafmæli í mars.

Fiorentina er þá búið að lána Amir Richardson til FC Kaupmannahafnar þar sem hann verður liðsfélagi Viktors Bjarka Daðasonar. Richardson er 24 ára miðjumaður sem á ennþá þrjú og hálft ár eftir af samningi við Fiorentina en það fylgir kaupmöguleiki með lánssamningnum, sem hljóðar upp á 8 milljónir evra.

Richardson á átta landsleiki að baki fyrir Marokkó en var ekki valinn í hópinn fyrir Afríkukeppnina.

Simon Sohm var sendur á lán til Bologna með kaupmöguleika og fer Giovanni Fabbian hina leiðina á svipuðu samkomulagi. Fabbian fylgir kaupskylda ef hann spilar ákveðið marga leiki fyrir Fiorentina.

Til gamans má geta að Fabbian skoraði eina mark Bologna í 1-2 tapi gegn Fiorentina í ítölsku deildinni um síðustu helgi.

Það hefur verið mikið að frétta innan herbúða Fiorentina í janúarglugganum eftir hörmulegan fyrri hluta tímabils. Félagið er búið að krækja í Jack Harrison, Marco Brescianini og Manor Solomon á lánssamningum.