Ítalski fjölmiðlamaðurinn Gianluca Di Marzio hefur greint frá því að Chelsea hafi nýtt sér ákvæði í samningi franska sóknarmannsins Olivier Giroud og þannig framlengt samning hans um eitt ár.
Samningur Giroud á að renna út eftir yfirstandandi leiktíð, en Chelsea ætlar ekki að leyfa honum að fara frítt.
Giroud, sem er 33 ára, var ekki í stóru hlutverki hjá Chelsea áður en hlé var gert á tímabilinu vegna kórónuveirufaraldursins. Hann var orðaður við Inter og Lazio í janúar, en var á endanum áfram í London.
Di Marzio heldur því einnig fram að Chelsea hafi áhuga á því að fá belgíska sóknarmanninn Dries Mertens frá Napoli. Samningur Mertens við Napoli rennur út eftir tímabilið og er Frank Lampard, stjóri Chelsea, búinn að ræða við leikmanninn.
Athugasemdir