Tómas Þór stillir fókusinn á myndavélinni.
Fótbolti.net fékk Tómas Þór Þórðarson, íþróttafréttamann hjá Sýn, til að rýna í byrjunarlið Íslands gegn Króatíu. Ísland stillir upp í 4-4-1-1 líkt og gegn Argentínu í fyrsta leik. Emil Hallfreðsson og Jóhann Berg Guðmundsson koma aftur inn í liðið auk þess sem Sverrir Ingi Ingason kemur inn í vörnina fyrir Kára Árnason.
„Sverrir Ingi er arftaki Kára Árnasonar en þetta er samt smá sjokk. Þetta er að koma svolítið á óvart. Maður vissi að Sverrir myndi koma inn í liðið í Þjóðadeildinni nema Kári fari til Tyrklansd og haldi honum áfram á bekknum," sagði Tómas.
„Sverrir Ingi er frábær miðvörður og stóð sig virkilega vel á þeim mínútum sem hann fékk fyrir Ragga í síðasta leik. Hann kom inn og gerði nákvæmlega það sem þurfti. Hann var sterkur í loftinu og heldur ógninni sem þarf í föstum leikatriðum hinumegin. Mér líst ágætlega á þetta en ég vorkenni Kára. Ég gæti trúað því að hann sé brjálaður á þessum tímapunkti."
Tómas er bjartsýnn fyrir leikinn. „Við vinnum 1-0. Króatarnir eru aðeins of peppaðir. Þeir eru að gera breytingar og strákarnir okkar eru nánast aldrei betri en með bakið upp við vegg," sagði Tómas með rándýr sólgleraugu á sér.
Hér að ofan má sjá viðtalið í heild sinni.
Athugasemdir
