27.08.25 - 13:00

Elvar Geir Magnússon

Í beinni: Arnar kynnir fyrsta hópinn í undankeppni HM

Mynd: Fótbolti.net - Hafliði Breiðfjörð

Í dag verður landsliðshópur Íslands fyrir fyrstu tvo leikina í undankeppni HM 2026 tilkynntur. Framundan er heimaleikur gegn Aserbaídsjan og útileikur gegn Frakklandi.

KSÍ hefur boðað til fréttamannafundar sem verður klukkan 13:15 og fylgst með honum í beinni lýsingu hér að neðan.

Leikir Íslands í riðlinum:

Föstudagur 5. september
18:45 Ísland - Aserbaídsjan

Þriðjudagur 9. september
18:45 Frakkland - Ísland

10. okt: Ísland - Úkraína
13. okt: Ísland - Frakkland
13. nóv: Aserbaídsjan - Ísland
16. nóv: Úkraína - Ísland

Í beinni

13:44Fundinum er lokið

Guðmundur Aðalsteinn tekur nú viðtal við Arnar Gunnlaugsson sem mun birtast hér á síðunni síðar í dag. Takk fyrir að fylgjast með.

13:43Markmannsmálin

Um Anton Ara: „Það er trikkí að vera þriðji markvörður í hóp. Það er kannski mjög ólíklegt að þú sért að fara að spila. Þú þarft að hafa kosti sem eru ómetanlegir, æfa á fullu og vera til taks fyrir þá leikmenn sem elska að skjóta á þig. Hann var mjög flottur í síðasta hóp."

Um samkeppnina hjá Hákoni og Elíasi: „Hákon átti stórleik í gær og Elías að spila vel fyrir Midtjylland."

Hvor spilar í landsleikjunum? „Það er mjög góður hausverkur að vera með þá báða, algjör veisla. Það er samkeppni hjá þeim eins og hjá mörgum öðrum. Samkeppni er af hinu góða og þeir ýta á hvorn annan."

13:40Hvernig er staðan á Aroni Einari?

„Hún er bara frábær. Hann hefur náð mjög góðu undirbúningstímabilinu og er fastamaður í sínu liði. Það eru jákvæð teikn á lofti. Hann verður í banni í fyrsta leik en hans reynsla verður okkur mjög dýrmæt í erfiðum útileik gegn Frökkum," segir Arnar.

13:38Um leikkerfið og spilamennskuna

„Það er alveg ljóst að við erum ekki að fara að spila eins gegn Aserum á heimavelli og Frökkum á útivelli. Það væri alveg galið. Við þurfum að halda í það sem við höfum gert vel. Við höfum hækkað okkar þátt með boltann mikið á skömmum tíma, mér finnst pressan okkar mjög flott. Svo eru þættir sem eru að bögga mig, við erum að fá á okkur of mörg færi og erum ekki að skapa nægilega mikið. Þetta eru tvö atriði sem við viljum halda."

13:34Sverrir Ingi er á bekknum í Grikklandi

„Það væri æskilegt ef hann væri búinn að fá fleiri mínútur. Það kemur á óvart að hann sé ekki að spila. En líkamlega er hann í toppstandi og ég hef ekki miklar áhyggjur af honum. Því miður fyrir okkur sem þjóð eru alltaf einhverjir leikmenn sem eru ekki að spila. Þetta er ekki eins og hjá Frakklandi og Englandi," segir Arnar.

13:31Um Albert Guðmundsson

Mynd: Fótbolti.net - Hafliði Breiðfjörð

„Samband okkar er frábært. Hann hefur staðið sig mjög vel síðan ég tók við. Við eigum inni hjá honum mörk og stoðsendingar en hann er einn af mörgum leikmönnum sem eru að læra inn á kerfi. Hann á enn eftir að finna meira jafnvægi og við þurfum að fá aðeins meira út úr honum á síðasta þriðjungi," segir Arnar.

13:31Arnar um nýliðana tvo; Daníel Tristan og Gísla Gottskálk

„Þetta eru ungir góðir leikmenn, þeir eru ekki bara þarna til að fylla upp í hópinn. Þeir eru að fara að gera sig gildandi. Malmö og Lech eru lið sem ég hef mætt, það er fjandsamlegt andrúmsloft að spila á þessum völlum. Þetta eru ungir töffarar sem hafa tekið skref upp á við og hver veit hversu langt þeir ná. Þeir koma með ferskleika inn í hópinn og mér finnst þeir eiga skilið að fá tækifæri. Sérstaklega miðað við hvernig við ætlum að spila þá henta þeir okkur gríðarlega vel."

13:27Arnar spurður út í að Gylfi Þór Sigurðsson sé ekki valinn

„Hann er búinn að standa sig vel í sumar en var ekki valinn í þetta skiptið. Það var ekkert smá erfitt að velja þennan hóp, það er gríðarlega mikið magn af leikmönnum sem eru að spila og það virkilega vel. Það var erfitt að velja þetta og Gylfi þarf að bíta í það súra epli að vera ekki valinn að þessu sinn," segir Arnar.

13:22Arnar spurður út í valið á Andra Lucasi

Andri Lucas Guðjohnsen er ekki að fá mikinn spiltíma með Gent í Belgíu og Arnar er spurður út í valið á honum. Arnar segir að Andri sé í frábæru líkamlegu standi þó það væri auðvitað betra ef hann væri að spila meira.

13:22Gott að fá fyrirliðann aftur inn

Mynd: Fótbolti.net - Hafliði Breiðfjörð

Orri Steinn Óskarsson var ekki með í síðasta landsliðsglugga en Arnar fagnar því að endurheimta fyrirliðann. Orri skoraði fyrir Real Sociedad um helgina í spænska boltanum.

13:20Þessi gluggi kemur aðeins of snemma fyrir Jóa Berg

Arnar segir að landsliðsglugginn komi aðeins of snemma fyrir Jóhann Berg sem er að byrjaður að æfa en ekki kominn í leikform. Hann segir valið á hópnum hafa verið erfitt. Jóhann spilar fyrir Al Dhafra í Sameinuðu arabísku furstadæmunum.

13:18Arnar fagnar því að geta spilað heima á Íslandi

Segir tilhlökkun fyrir því að leika á Laugardalsvelli fyrir framan okkar áhorfendur. Hann er ánægður með það hvernig miðasalan fer af stað.

13:17Fréttamannafundurinn er hafinn

Mynd: Fótbolti.net - Hafliði Breiðfjörð

Ómar Smárason fjölmiðlafulltrúi og Arnar Gunnlaugsson landsliðsþjálfari eru mættir í pontu.

13:16Laugardalsvöllur sjaldan litið betur út

Mynd: Fótbolti.net - Haukur Gunnarsson

Hybrid grasið fékk að njóta sín þegar bikarúrslitaleikurinn var spilaður síðasta föstudag.

13:15Hér er hópurinn í heild

27.08.2025 13:10

Landsliðshópurinn: Daníel Tristan ásamt bróður sínum í hópnum

13:13Mikilvægt að vinna fyrsta leik

Um er að ræða tvo fyrstu leiki liðsins í undankeppninni. Ísland mætir Aserbaísjan á Laugardalsvelli föstudaginn 5. september og Frakklandi á Prinsavöllum í París þriðjudaginn 9. september. Úkraína er þriðja liðið í riðlinum.

Efsta liðið mun komast beint á HM 2026 en liðið í öðru sæti fer í umspil.

Það er alveg ljóst að fyrsti leikurinn, gegn Aserbaídsjan, mun örugglega skipta höfuðmáli upp á möguleika Íslands. Þar þarf að vinnast sigur.

Leikir Íslands í riðlinum:

Föstudagur 5. september
18:45 Ísland - Aserbaídsjan

Þriðjudagur 9. september
18:45 Frakkland - Ísland

10. okt: Ísland - Úkraína
13. okt: Ísland - Frakkland
13. nóv: Aserbaídsjan - Ísland
16. nóv: Úkraína - Ísland

13:08Aron Einar er í hópnum

Mynd: Fótbolti.net - Hafliði Breiðfjörð

13:06Ýmislegt áhugavert

Jóhann Berg Guðmundsson er að glíma við meiðsli og því ekki með. Daníel Tristan Guðjohnsen er í hópnum í fyrsta sinn en bróðir hans Andri Lucas Guðjohnsen er á sínum stað.

Gísli Gottskálk Þórðarson miðjumaður Lech Poznan gæti spilað sinn fyrsta landsleik. Umræða var um hvort Gylfi Þór Sigurðsson yrði í hópnum en hann er ekki valinn.

13:04Hópurinn

Elías Rafn Ólafsson - FC Midtjylland - 7 leikir
Hákon Rafn Valdimarsson - Brentford F.C. - 20 leikir
Anton Ari Einarsson - Breiðablik - 2 leikir

Logi Tómasson - Samsunspor - 10 leikir, 1 mark
Mikael Egill Ellertsson - Genoa CFC - 21 leikur, 1 mark
Daníel Leó Grétarsson - SonderjyskE - 24 leikir
Aron Einar Gunnarsson - Al-Gharafa SC - 107 leikir, 5 mörk
Sverrir Ingi Ingason - Panathinaikos F. C. - 59 leikir, 3 mörk
Guðlaugur Victor Pálsson - AC Horsens - 50 leikir, 3 mörk
Bjarki Steinn Bjarkason - Venezia FC - 5 leikir
Gísli Gottskálk Þórðarson - Lech Poznan
Ísak Bergmann Jóhannesson - 1. FC Köln - 35 leikir, 4 mörk
Þórir Jóhann Helgason - U. S. Lecce - 19 leikir, 2 mörk
Stefán Teitur Þórðarson - Preston North End F.C. - 30 leikir, 1 mark
Hákon Arnar Haraldsson - LOSC Lille - 22 leikir, 3 mörk
Albert Guðmundsson - ACF Fiorentina - 41 leikur, 10 mörk
Kristian Nökkvi Hlynsson - FC Twente - 4 leikir
Willum Þór Willumsson - Birmingham City F. C. - 18 leikir
Jón Dagur Þorsteinsson - Hertha BSC - 46 leikir, 6 mörk
Mikael Neville Anderson - Djurgårdens IF Fotboll - 33 leikir, 2 mörk
Sævar Atli Magnússon - SK Brann - 6 leikir
Andri Lucas Guðjohnsen - K.A.A. Gent - 34 leikir, 9 mörk
Orri Steinn Óskarsson - Real Sociedad - 16 leikir, 7 mörk
Daníel Tristan Guðjohnsen - Malmö FF

13:02Miðasala

Miðasala á leikinn gegn Aserbaídsjan fer í gang á fimmtudag.

13:01Fundurinn hefst klukkan 13:15

Guðmundur Aðalsteinn verður á honum fyrir hönd Fótbolta.net og mun spyrja Arnar Gunnlaugsson út í valið.

Mynd: Fótbolti.net - Elvar Geir Magnússon

12:55Velkomin í þessa beinu textalýsingu

Sæbjörn Steinke var með vangaveltur um það hvernig landsliðshópurinn gæti litið út.

21.08.2025 15:00

Mögulegur landsliðshópur Arnars - Ný nöfn í hópnum?