„Það var rætt við Hannes síðastliðið haust og eitthvað fram yfir áramót. Það kom töluvert snemma í ljós í viðræðunum að hugur hans leitaði til Vals. Maður fann það. Þess vegna hættum við að vinna í því," sagði Rúnar í Miðjunni.

Beitir Ólafsson hefur varið mark KR undanfarin ár og hann var valinn í lið ársins í Pepsi Max-deildinni í sumar eftir frammistöðu sína í sumar.

Fyrir mótið í sumar sagði Rúnar í Pepsi Max-mörkunum: „Ég er sannfærður um að Beitir sé besti markvörður á Íslandi í dag."

Ummælin vöktu athygli enda var landsliðsmarkvörðurinn Hannes nýkominn í Val á þessum tíma.

„Þegar ég sagði þetta var ég ekkert að grínast með það. Mér fannst hann besti leikmaðurinn sem við gátum haft í markinu og á þeim tímapunkti var hann bestur á Íslandi. Þarna var Hannes bara búinn að spila með einn leik en með fullri virðingu fyrir Hannesi, sem er líka okkar besti markvörður, þá fannst mér Beitir henta jafn vel og hann" sagði Rúnar í Miðjunni.

„Beitir er frábær markvörður. Maður áttaði sig á því síðastliðið haust að hann er kannski sá sem hentar okkur best. Það getur stundum verið gott að hafa markvörð sem er góður í fótbolta og getur spilað út frá marki. Við í KR vildum frekar hafa einn stóran sem er sterkur inn í teig og tekur mikið af fyrirgjöfum. Hann er stór, fljótur og mjög góður í að verja skot utan af velli. Mér fannst hann henta okkur ofboðslega vel. Hann er frábær karakter og geggjaður inni í klefanum. Það er dýrmætt líka."

Hægt er að hlusta á nánara spjall við Rúnar í Miðjunni.