Heimild: Vísir.is
Emil Hallfreðsson í leik með íslenska landsliðinu á HM
Landsliðsmaðurinn Emil Hallfreðsson er bjartsýnn á að geta spilað landsleikina gegn Sviss og Belgíu í Þjóðadeildinni en hann greindi frá þessu í viðtali við Kjartan Atla Kjartansson í kvöldfréttum Stöðvar 2.
Emil meiddist aftan í læri í markalausu jafntefli gegn Bologna um helgina og var óvíst um þátttöku hans með íslenska landsliðinu í Þjóðadeildinni.
Hann fór í læknisskoðun í dag og er nú útlit bjartara en flestir gerðu sér grein fyrir.
„Ég er nokkuð brattur á þetta. Þetta var aftan í læri og smá áreynsla. Þetta er stífleiki og nær því ekki einu sinni að vera tognun," sagði Emil við Kjartan Atla í kvöldfréttum Stöðvar 2.
Þetta eru afar jákvæðar fréttir fyrir íslenska landsliðið en hann hefur verið lykilmaður í liðinu síðustu ár.
Það er þó enn óljóst hvort Jóhann Berg Guðmundsson, leikmaður Burnley, verði klár í landsleikina en það kemur í ljós á næstu sólarhringum.
Athugasemdir
