Þýskaland: Bayern skoraði fimm gegn Dusseldorf

FC Bayern gjörsamlega rúllaði upp fallbaráttuliði Fortuna Düsseldorf er liðin mættust í síðasta leik dagsins í þýska boltanum.

Veislan byrjaði á fimmtándu mínútu þegar danski varnarmaðurinn Mathias Jörgensen, einnig þekktur sem Zanka, fékk misheppnað skot frá Benjamin Pavard í sig og skoraði sjálfsmark.

Pavard tvöfaldaði forystu Bayern korteri síðar með skalla eftir hornspyrnu og gerði Robert Lewandowski þriðja markið skömmu fyrir leikhlé. Mark Lewandowski kom eftir glæsilega tiki-taka sókn.

Lewandowski bætti öðru marki sínu við í upphafi síðari hálfleiks og gerði Alphonso Davies fimmta og síðasta mark leiksins skömmu síðar.

Bayern er með tíu stiga forystu á toppi þýsku deildarinnar sem stendur en Dortmund getur minnkað hana niður í sjö stig með sigri gegn Paderborn á morgun.

Lewandowski er orðinn markahæsti leikmaður helstu deilda Evrópu með 29 mörk.