England: Arsenal tók Tottenham í kennslustund

Arsenal er í góðri stöðu eftir frábæran sigur í toppbaráttu ensku úrvalsdeildarinnar í dag. Arsenal tók á móti erkifjendum sínum úr Tottenham og vann sannfærandi sigur.

Thomas Partey kom Arsenal yfir með fallegu marki utan vítateigs þar sem hann lagði boltann viðstöðulaust upp í samskeytin. Harry Kane jafnaði úr vítaspyrnu tíu mínútum síðar og var staðan jöfn eftir fjörugan fyrri hálfleik þar sem heimamenn sýndu þó þokkalega yfirburði.

Í síðari hálfleik jukust yfirburðir Arsenal og kom Gabriel Jesus sínum mönnum yfir strax í upphafi. Hann fylgdi þá skoti Bukayo Saka eftir með marki en hægt að setja spurningarmerki við hvort Hugo Lloris hafi átt að halda skotinu betur eða vera sneggri að bregðast við eftir að hafa misst boltann frá sér.

Emerson Royal fékk beint rautt spjald á 62. mínútu fyrir að traðka á fæti Gabriel Martinelli með hælnum og svaraði Granit Xhaka þessu broti með marki fimm mínútum síðar.

Xhaka gerði þar með út um leikinn og urðu lokatölur 3-1 fyrir Arsenal sem hefði getað unnið stærra. Frábær sigur fyrir Mikel Arteta og lærisveina hans sem eru með fjögurra stiga forystu á toppi úrvalsdeildarinnar. Manchester City er í öðru sæti og tekur á móti nágrönnum sínum í Manchester United á morgun.

Tottenham situr eftir við hlið Man City í þriðja sæti með 17 stig.