Ratcliffe: Ekki ég sem tek ákvörðun um Ten Hag

Sir Jim Ratcliffe meðeigandi Manchester United segir að framtíð Erik ten Hag sé ekki í sínum höndum. Það séu aðrir sem taki ákvarðanir um hver eigi að stýra liðinu.

Dan Roan hjá BBC spurði Ratcliffe hvort hann hefði enn trú á því að Ten Hag væri rétti maðurinn?

„Ég vil ekki svara þeirri spurningu. Ég kann vel við Erik. Ég tel að hann sé mjög góður þjálfari en að lokum er það ekki ég sem tek þessar ákvarðanir. Það er stjórnendahópurinn sem ákveður hvernig best er að reka liðið út frá ýmsum þáttum," segir Ratcliffe.

Hann er þar að tala um framkvæmdastjórann Omar Berrada og yfirmann fótboltamála Dan Ashworth.