HK mun spila áfram í Bestu deildinni næsta sumar þrátt fyrir tap gegn KA í dag. Ómar Ingi Guðmundsson þjálfari liðsins var svekktur með tapið en sáttur með árangurinn á tímabilinu.
Lestu um leikinn: KA 1 - 0 HK
„Auðvitað ekki sáttur með að tapa lokaleiknum en ég ætla leyfa mér að vera ánægður eitthvað framyfir helgi að við hefðum haldið okkur í deildinni. Ég var á fyrsta heila árinu í meistaraflokksþjálfun með uppeldisklúbbinn minn," sagði Ómar Ingi.
HK hóf tímabilið af krafti og var ekki í neinni fallbaráttu fyrr en undir lok móts.
„Við erum í 8. sæti eftir 22 leikja mótið, félagið hefur ekki verið það hátt áður. Félagið hefur ekki skorað jafn mörg mörk í efstu deild áður og við vinnum Blikana tvisvar. Það er fullt til að vera drullu ánægður með þótt síðustu dagar hafi verið smá þungir. Þrjár umferðir af 27 í fallbaráttu er töluvert langt frá því sem ég held ég geti sagt að allir spáðu fyrir mót," sagði Ómar Ingi.
Margir mikilvægir leikmenn liðsins eru að verða samningslausir.
„Vonandi er það á fullu. Það er ekki mitt að klára að semja við leikmenn en ég er búinn að ræða við þessa stráka og stjórnina að ég vilji fara láta ganga frá þessu. Það er fjárhagslegur munur að vera í efstu deild og næst efstu deild. Mönnum er spáð falli og soga sig í fallbaráttu í lokin þá vilja menn bara klára verkefnið áður en menn fara skuldbinda sig lengur. Ég held að það eigi jafnt við um leikmenn og félagið. Ég vona að við getum farið að ganga í þetta af krafti á næstu dögum," sagði Ómar.
„Að því gefnu að við náum að halda þeim leikmönnum sem við ætlum okkur að halda þá tel ég hópinn vera nógu sterkan til að gera það sama og jafnvel betra á næsta ári. Það eru hlutir innan hópsins sem við þurfum að vinna með. Við þurfum líka að bæta við okkur, eldri leikmenn eru orðnir þreyttir, við vorum ekki í þessari deild í fyrra. Það þarf nýja forritun í eldri skrokkana í 27 leikja mótinu til að aðlagast því."
