Íslenska landsliðið er mætt til Frakklands þar sem það mætir franska landsliðinu í æfingaleik á fimmtudagskvöldið. Elvar Geir, fréttamaður Fótbolti.net er mættur með liðinu til Frakklands og mun fylgja því eftir í þessu verkefni. Elvar náði tali af Rúnari Má í kvöld.
„Við tókum létta æfingu áðan þar sem að margir voru að spila í gær, þar á meðal ég. Síðan erum við búnir að taka tvo fundi en þeir verða sennilega eitthvað fleiri á næstu dögum, það fylgir þessu."
Þrátt fyrir stór töp gegn Belgum og Sviss í síðustu leikjum segir Rúnar að stemningin í hópnum sé góð.
„Þetta er bara létt og skemmtilegt. Það er bara gaman að hitta strákana eins og alltaf. Það er alltaf gott að komast aðeins útúr sínu umhverfi sem maður er í með sínu félagsliði. Það er bara létt yfir strákunum og við erum bjartsýnir"
Rúnar segir að engin hræðsla sé í hópnum við það að mæta heimsmeisturunum.
„Ef við værum hræddir við Frakka þá værum við á vitlausum stað. Það vilja allir spila á móti bestu leikmönnum í heimi og draumurinn er að máta sig við þá. Við erum spenntir og ætlum að byggja ofaná góðu hlutina sem við gerðum á móti Belgíu."
Rúnar leikur með Grassophers í Sviss en hans lið situr í neðri hluta töflunnar hann talar um að staðan sé fljót að breytast.
„Ég er ekkert mikið að líta á töfluna. Þetta eru tíu lið en bilið frá neðsta uppí efsta eru ekki nema 6-7 stig þannig ef þú vinnur tvo þá ertu kominn í Evrópusæti en ef þú tapar þá ertu kominn í fallsæti. Þetta snýst um að tengja saman nokkra sigurleiki sem að okkur hefur ekki tekist að gera."
Viðtalið við Rúnar má sjá í heild sinni hér að ofan.
Athugasemdir