Marokkóski miðjumaðurinn Sofyan Amrabat er líklega að skipta um félag í sumar eftir að hafa tapað í úrslitaleik Sambandsdeildarinnar á miðvikudagskvöldið. Amrabat og félagar í Fiorentina töpuðu 2-1 gegn West Ham United.
Nordin Amrabat, eldri bróðir Sofyan og núverandi leikmaður AEK Aþenu í Grikklandi, var spurður hvort eitthvað væri til í þeim orðrómi að West Ham vildi kaupa Sofyan til að fylla í skarðið sem myndast þegar Declan Rice verður seldur í sumar.
„Sofyan er ekki að fara til West Ham. Hann vill spila fyrir topplið og helst á Spáni. Barcelona er draumurinn og hann er ofarlega á lista hjá félaginu, en þið vitið hvernig fjárhagsástandið er hjá þeim," segir Nordin Amrabat, en Fiorentina er talið vilja fá 20 til 25 milljónir evra fyrir Sofyan, sem á eitt ár eftir af samningi sínum við félagið.
„Það eru fleiri félög sem vilja einnig fá Sofyan til sín en hann er með Barcelona í forgangi."
Barcelona er í leit að tveimur miðjumönnum í sumar en ólíklegt er að félagið geti leyft sér að eyða háum fjárhæðum og mun því líklegast leitast eftir að fá leikmenn til sín á frjálsri sölu.
Manchester United hefur verið orðað við Amrabat og gæti látið til skarar skríða í sumar.