Valur þurfti að sætta sig við svekkjandi 4-0 tap gegn SKN St. Pölten í fyrri leik liðanna í umspilinu um sæti í riðlakeppni Meistaradeildarinnar. Það er ljóst að það er ansi langsótt að markmið Vals um að komast í riðlakeppnina verði að veruleika í þetta skiptið.
Lestu um leikinn: Valur 0 - 4 SKN St. Pölten
„Það er hægt að segja helling“ sagði Pétur Pétursson, þjálfari Vals, eftir tapið í kvöld.
„Mér fannst við spila þetta vel í fyrri hálfleik, við lokuðum vel á þær. Ódýrt mark sem við fáum á okkur svo fáum við annað markið á okkur sem mér fannst ódýrt líka, bara langskot sem þær skora úr. Þá fannst mér svona dofna yfir öllu hjá okkur“ hélt hann svo áfram.
Í stöðunni 2-0 var eins og Valskonur hefðu hreinlega gefist upp og þær fá á sig önnur tvö mörk á tíu mínútna kafla. Þá var holan orðin ansi djúp og það verður erfitt að skríða upp úr henni.
Eftir síðasta leik hjá Val töluðu þau um að sá leikur hefði verið hálfgerð æfing fyrir það sem þau vildu gera í þessum leik. Aðspurður hvar þau ætluðu sér að særa andstæðingana í dag sagði hann:
„Ég ætla að taka það fram að þetta er gott lið, þetta er klínískt lið og þær nýttu sín færi. Ég held þær hafi átt kannski fjögur skot á markið og þær skora fjögur mörk. Við náttúrulega vorum að reyna ákveðna hluti og stundum gengur það upp og stundum ekki.“
Viðtalið má sjá í heild sinni í spilaranum hér að ofan.
