Þróttarar í erfiðleikum í föstum leikatriðum
Guðlaugur Baldursson þjálfari Þróttar var skiljanlega svekktur eftir leik sinna manna í Lengjudeildinni í kvöld. Þróttarar byrjuðu leikinn af krafti en áttu í erfiðleikum með að verjast föstum leikatriðum Fram.
Lestu um leikinn: Fram 5 - 1 Þróttur R.
„Svekktur, við töpuðum þessum leik í fyrri hálfleik. Það er skrýtið að segja það en við fengum á okkur fjögur mörk í fyrri hálfleik, öll eftir föst leikatriði. Spilamennskan úti á vellinum var alls ekki slæm og við fengum mjög góð færi til að skora mörk. En þú þarft að sinna öllum atriðum leiksins og það var gríðarlega svekkjandi að vera búnir að tapa leiknum í hálfleik," sagði Guðlaugur.
Róbert Hauksson slapp einn í gegn eftir fjórar mínútur en Ólafur varði vel.
„Hann gerði vel og var áræðinn sem hann er sem leikmaður en var óheppinn og Óli varði það vel. Stöngin út þá en gerði svo gott mark."
Hvað fór úrskeiðis í föstu leikatriðum Framara í dag?
„Í föstum leikatriðum snýst þetta um að taka ábyrgð og vera með sín hlutverk á hreinu og sinn mann. Við gerðum það ekki, það var slökkt á okkur. Þetta var lélegt hjá okkur."
„Hann fékk slæmt högg á öxlina og er hálf meiddur," sagði Guðlaugur þegar hann var spurður út í stöðuna á Lárusi Björnssyni.
Næsti leikur er á móti Aftureldingu
„Það verður hörkuleikur, allir leikir í þessari deild eru hörkuleikir. Það verður alvöru verkefni fyrir okkur."
Nánar er spjallað við Guðlaug í spilaranum hér að ofan.
Athugasemdir
