Sadio Mane kom Liverpool yfir rétt fyrir leikhlé og tvöfaldaði Roberto Firmino forystuna eftir sendingu frá Mane í seinni hálfleik.

Danny Ings kom af bekknum og minnkaði muninn eftir skelfileg mistök hjá Adrian í markinu. Hann virtist hafa nægan tíma á boltanum eftir sendingu frá Virgil van Dijk en Ings mætti í pressuna og endaði boltinn í netinu. Adrian sparkaði knettinum í Ings og var þetta í annað sinn í leiknum sem markvörðurinn lenti í vandræðum með hápressu.

Meira var þó ekki skorað og mikilvæg stig í hús hjá Liverpool fyrir erfiðan leik gegn Arsenal um næstu helgi.

Southampton 1 - 2 Liverpool
0-1 Sadio Mane ('45 )
0-2 Roberto Firmino ('71 )
1-2 Danny Ings ('83 )

Bernard skoraði þá eina mark leiksins er Everton hafði betur gegn Watford. Gylfi Þór Sigurðsson lék allan leikinn á miðju heimamanna sem eru með fjögur stig eftir tvær umferðir og ekki búnir að fá mark á sig.

Nýliðar Aston Villa töpuðu þá fyrir Bournemouth þar sem Harry Wilson, á lánssamningi frá Liverpool, skoraði annað mark gestanna. Douglas Luiz, fyrrum leikmaður Man City, skoraði fyrir Villa í leiknum.

Mark var dæmt af Leo Trossard með myndbandstækninni er Brighton gerði 1-1 jafntefli við West Ham og þá skoraði finnski framherjinn Teemu Pukki þrennu í góðum sigri Norwich.

Norwich fékk Newcastle í heimsókn og skoraði finnska markavélin öll mörk liðsins í 3-1 sigri. Pukki skoraði 29 mörk í 43 deildarleikjum á síðustu leiktíð.

Everton 1 - 0 Watford
1-0 Bernard ('10 )

Aston Villa 1 - 2 Bournemouth
0-1 Joshua King ('2 , víti)
0-2 Harry Wilson ('12 )
1-2 Douglas Luiz ('71 )

Brighton 1 - 1 West Ham
0-1 Javier Hernandez ('61 )
1-1 Leandro Trossard ('65 )

Norwich 3 - 1 Newcastle
1-0 Teemu Pukki ('32 )
2-0 Teemu Pukki ('63 )
3-0 Teemu Pukki ('75 )
3-1 Jonjo Shelvey ('93)