Framundan er vináttulandsleikur gegn Katar á mánudaginn.

Ísland hefur ekki náð að vinna alvöru landsleik á árinu en vonast er til þess að það breytist á mánudag.

„Þetta er síðasti leikurinn á þessu ári og það er mikilvægt að enda árið á sigri," sagði Guðlaugur Victor en hann er í topppmálum þrátt fyrir að vera nýbúinn að stíga upp úr meiðslum.

„Ég náði að spila aðeins áður en ég kom hingað. Lærið er alveg búið að halda, ég fann ekkert fyrir þessu í síðasta leik með Zürich eða á móti Belgíu. Ég er í toppmálum."

„Við höfum gert mjög vel í síðustu leikjum, Belgarnir, besta lið í heimi, átti erfitt með okkur. Byrjunin var hræðileg en það er jákvætt að síðustu leikir hafi litið betur út. Við höfum ekki unnið lengi og það er mikilvægt að enda þetta ár á sigri. Svo einbeitum við okkur að því sem kemur í mars."

Ótrúleg meiðslavandræði Íslands í kringum þetta verkefni hafa mikið verið í umræðunni.

„Það koma bara nýir strákar inn, þetta eru allt saman fínir og skemmtilegir strákar. Það er góður húmor og svona í hópnum. Maður er ekki að velta sér of mikið upp úr þessum meiðslum og forföllum," sagði Guðlaugur Victor að lokum en viðtalið við hann er í heild sinni hér að ofan.