„Tilhugsunin er frábær. Ég er mjög ánægður með þetta. Það kom aldrei neitt annað lið til greina að spila með í rauninni ef ég var að koma heim á annað borð," sagði Kári Árnason í viðtali eftir undirskriftina í Víkinni í dag.

Hann segir að það hafi alveg komið til greina að vera áfram úti í atvinnumennsku og fresta heimkomunni um nokkra mánuði.

„Ef rétta boðið hefði komið á borðið þá hefði ég skoðað það. Mér bauðst að spila í Tyrklandi en ég hafði ekki áhuga á því en þetta var endanleg ákvörðun."

Svipuð staða var uppi á sama tíma í fyrra en þá ákvað Kári að taka slaginn í eitt ár í viðbót í atvinnumennsku.

„Mér fannst ég ekki vera alveg tilbúinn að koma heim strax. Mér finnst ég eiga góð ár eftir. Mér fannst ég geta spilað á hærra leveli í lengri tíma í fyrra og það hefur svosem ekkert breyst mikið en ég er meira til í það andlega að koma heim og klára þetta hérna."

Hann fær keppnisleyfi með Víkingum þegar glugginn opnar þann 1. júlí en sama dag leikur liðið gegn ÍA. Samningurinn er út næsta tímabil, 2020. Hann segir ekkert ákveðið hvort hann leggi skóna á hilluna eftir tímabilið á næsta ári.

„Ég er ekkert búinn að ákveða það í rauninni. Þetta er mjög þægilegt fyrir mig. Við ætlum okkur á EM og þá myndi ég klára tímabilið eftir EM og síðan getum við tekið stöðuna þegar það er búið," sagði Kári.

Viðtalið í heild sinni má sjá í sjónvarpinu hér að ofan.