Það var létt yfir Dagnýju og íslenska liðinu á æfingu í Znojmo í dag
Fótbolti.net náði tali af Dagný Brynjarsdóttur fyrir æfingu íslenska landsliðsins í Znojmo fyrr í dag. Dagný og liðsfélagar undirbúa sig af krafti fyrir leikinn mikilvæga gegn Tékkum í undankeppni HM 2019 sem spilaður verður á morgun.
„Ég held við séum orðnar mjög klárar. Við tókum tvo góða fundi í gær og fórum yfir Tékkana. Við erum að fara á æfingu núna seinna í dag og þá förum við yfir lokaatriðin en ég held að við séum orðnar klárar,“ sagði Dagný og sagði frá andstæðingunum.
„Þær eru öflugar. Spila flestar í tveimur toppliðum í Tékklandi og bæði liðin eru inní Meistaradeildinni. Svo eru þær með 2-3 leikmenn sem spila í þýsku Bundesligunni. Þær eru öflugar. Snöggar, sterkar, teknískar og með góða sendingagetu þannig að þetta verður hörkuleikur.“
En hefur hún hugmynd um hvernig tékknesku liðin standa í samanburði við liðin í Pepsi-deildinni heima á Íslandi?
„Nei, svosem ekki. Maður verður bara að sjá þegar þær mæta Stjörnunni,“ svaraði Dagný sem telur að svo gæti farið að íslenska liðið verði mögulega meira með boltann á morgun heldur en gegn Þjóðverjum á föstudag.
„Ég held að það henti okkur bara vel. Okkur finnst gaman að hafa boltann og við þurfum bara að vera rólegar og yfirvegaðar. Velja réttar sendingaleiðir, vera einbeittar varnarlega og nýta færin okkar sóknarlega.“
Hægt er að horfa á viðtalið í heild sinni í spilaranum hér að ofan.
Athugasemdir
