„Við erum bara ánægðir með leikinn. Stóðum okkur vel og lögðum okkur mikið fram á móti flottu Aftureldingarliði, sem að er nýbúið að koma til baka og vinna á móti KR. Það er skemmtileg ára yfir Aftureldingu, bara gott lið á boltann og mér fannst við bara standa okkur vel í dag. Mér fannst við fá færin í fyrri hálfleik, fáum tvö góð færi. Þeir bjarga einu sinni á línu og svo skot á vítateignum. Svo er seinni hálfleikur þannig að við erum meira að reyna að ná markinu,'' sagði Hallgrímur Jónasson, þjálfari KA eftir 1-0 sigur á Aftureldingu í Bestu-deild karla í kvöld.
Lestu um leikinn: KA 1 - 0 Afturelding
Hallgrímur talaði um augljóst mikilvægi þess að vinna fótboltaleiki og hann sagði að það hefði verið frábært að sjá hversu vel menn bökkuðu hvorn annan upp. Þá var augljóst eftir afleitan varnarleik gegn Fram að eitthvað þyrfti að breytast. KA liðið hefur núna haldið hreinu í tveimur leikjum í röð og það er eitthvað til þess að byggja á.
„Við þurftum að átta okkur á því að við þyrftum að verjast betur sem lið, því að hitt var ekki að ganga og margar ástæður fyrir því. Byrja á því að sinna vörninni og ég hef fengið frábær svör. Tveir leikir þar sem að allir leggja sig fram og þá gerast góðar hlutir. Við erum með frábært lið, frábæra leikmenn og frábært KA hjarta. Við sáum það bara undanfarin ár, hvernig þeir standa saman þegar illa gengur og það er auðvelt að standa saman þegar að vel gengur - en þegar illa gengur kemur aðeins í ljós úr hverju þú ert gerður. Stjórnin, fólkið hérna í KA heimilinu, áfram gakk. Þannig komum við okkur út úr vandræðunum og akkúrat núna er góð tilfinning, en það er vissulega mikil vinna framundan og mótið er bara nánast rétt byrjað,'' sagði Hallgrímur Jónasson.
Viðtalið má sjá í heild sinni í spilaranum hér að ofan.
