„Mikilvægast í þessu er að við höldum hreinu og erum að berjast fyrir hvorn annan, þetta er á réttri leið. Afturelding eru með mjög vel spilandi lið og erfitt að verjast gegn þeim, sérstaklega á svona blautu grasi, en við gerðum þetta mjög vel og hefðum svosem getað skorað fleiri en eitt mark en eitt dugði fyrst við höldum hreinu,'' sagði hetja KA manna, Hallgrímur Mar Steingrímsson eftir 1-0 sigur á Aftureldingu í kvöld.
Lestu um leikinn: KA 1 - 0 Afturelding
Eftir slæmt bikartap gegn Fram var farið í grunngildin og sagði Hallgrímur að hljóðið í mönnum hefði verið þungt í kjölfar tapsins.
„Það var högg. Það var mjög þungt inni í klefa eftir Fram leikinn, þannig að menn greinilega hafa bara litið í eigin barm og ákveðið að stíga upp. Allir búnir að vera að stíga upp síðan þá og erum að berjast fyrir hvern annan og við sóknarmennirnir erum að hlaupa aðeins meira, þannig að það skilar auðvitað og við höldum hreinu.''
Undirritaður sagði síðan að þrátt fyrir að það hefði kannski ekki allt gengið upp sem að Hallgrímur hefði reynt inná vellinum í dag, að þá hefði hann verið klár þegar að augnablikið sýndi sig. Hallgrímur var klár með kvittanir!
„Ég átti að leggja upp þrjú mörk, þannig að ég var með ágætis sendingar sko! En heppnin var með mér, ég skoraði ágætis mark. Ég var bara ákveðinn í að hætta ekki að reyna. Einhverntímann fer þetta að koma,'' sagði Hallgrímur.
Hrannar bróðir Hallgríms gerði virkilega vel í að halda boltanum í leik þegar Hallgrímur skoraði draumamarkið og hann fékk hrósið sem að hann átti skilið frá brósa.
„Hann er náttúrulega naut að burðum - hálfgerður naggur! En já, bara frábær leikmaður og gaman að spila með honum.''
Viðtalið má sjá í heild sinni í spilaranum hér að ofan.
