Conte með alltof miklar kröfur fyrir ítölsk félög
Conte þarf að lækka kröfurnar til að taka við ítölsku félagi.
Mynd: Getty Images
Conte þarf að lækka kröfurnar til að taka við ítölsku félagi.
Mynd: Getty Images
Antonio Conte er staddur með fjölskyldu sinni í Tórínó á Ítalíu um þessar mundir eftir að hafa sagt upp starfi sínu hjá Tottenham í gær.
Conte er í starfsleit og langar hann að taka við félagi í ítalska boltanum en gæti lent á nokkrum hindrunum. Frá þessu greinir Sky á Ítalíu.
Fyrsta hindrunin eru launakröfur þjálfarans en sú stærsta eru kröfur hans um leikmannakaup.
Conte hefur skýrar hugmyndir um þær tegundir leikmanna sem hann vill hafa í hóp hjá sér en þeir leikmenn eru sjaldan ódýrir. Ítölsk félög hafa ekki jafn mikinn pening á milli handanna og þau ensku og eiga þar af leiðandi í meiri erfiðleikum með að fjárfesta í hágæða leikmönnum.
Þetta upplifði Conte þegar hann var við stjórnvölinn hjá Inter í tvö ár frá 2019 til 2021. Þar lét hann af störfum vegna ósættis við stjórnina sem gat ekki keypt þá leikmenn sem Conte vildi fá til félagsins.
