„Þetta var sannarlega leikur tveggja hálfleika, það var mikil barátta og andi í seinni hálfleik, allir stuðningsmennirnir sem komu alla þessa leið vilja sjá 11 leikmenn gefa allt sem þeir eiga í leikinn. Við gerðum það í seinni hálfleik og hefðum við gert það í fyrri líka hefðum við unnið leikinn," sagði Gregg Ryder eftir 1-1 jafntefli gegn ÍBV í Vestmannaeyjum.
Lestu um leikinn: ÍBV 1 - 1 Þróttur R.
Mikil batamerki voru á leik Þróttar í seinni háfleik í dag og mátti heyra að Gregg var nokkuð sáttur með sína menn.
„Hvar hefur þetta verið í allt sumar? Mér fannst þetta vera í fyrsta skipti í dágóðan tíma sem við sýndum virkilega ástríðu, löngun og ákveðni í leik okkar, við erum ekki stærðfræðilega fallnir enn og ef við sýnum svona frammistöðu í 90 mínútur í næstu leikjum er þetta alveg hægt, sagði Gregg.
„Við erum í erfiðri stöðu en þetta er ekki ómögulegt, ég myndi ekki segja að það þurfi kraftaverk, við þurfum bara að vinna restina af leikjunum og það er ekkert kraftaverk, það er fótbolti,"
Að lokum var Gregg spurður hvort hann hefði áhuga á þjálfarastarfinu hjá ÍBV ef hann fengi símtalið.
„Nei, Þróttur er mitt félag, stuðningurinn hefur verið frábær og ég hef ekki enn lokið verki mínu hér,"
Athugasemdir
