FH vann sannfærandi 3-0 sigur á Þrótti í Kaplakrika í kvöld.
Aðspurður um fyrstu viðbrögð eftir leik svaraði Ólafur Kristjánsson þjálfari Þróttar,
„Bragurinn á liðinu og frammistaðan var ekki til mikils meira heldur en að fá þessi úrslit. FH liðið átti þetta skilið, þær voru grimmari. Við vorum að ströggla, náðum ekki að ógna þeim að neinu leyti þannig það er svekkjandi að koma sér ekki inn í leikinn.
„Maður getur verið svekktur með frammistöðuna og svekktur með úrslitin en þegar maður bara rúllar yfir þetta þá var þetta bara verðskuldað hjá FH, við vorum bara ekki nægilega grimmar.“
Lestu um leikinn: FH 3 - 0 Þróttur R.
„Við erum að spila á móti liði sem að er kröftugt, er öflugt pressulið, vill hafa leikinn fram og til baka og rólegan og þær gera það mjög vel. Okkar svona plan var að reyna að kontrólera leikinn meira, það tókst ekki. Sendingar, móttökur, ákvarðanatökur með boltann voru heldur ekki góðar.“
„Við lifðum þannig séð af, 1-0 staða er alls ekki slæmt en þegar annað markið kom þá fannst mér trúin fara úr liðinu og loftið úr því og FH-ingarnir bættu við þriðja markinu. Þannig svona heilt yfir þá vorum við alltaf að elta.“
Þróttarar hafa eftir tapið í kvöld misst FH liðið aðeins frammúr sér og munar nú 6 stigum á liðunum sem sitja í 2. og 3. sæti deildarinnar.
„Þú ert alltaf að keppa, þú ert að keppa við sjálfan þig, þú ert að keppast um að verða betri og bæta þig og svo er talið upp úr þessum fræga poka á haustin og þá sjáum við niðurstöðuna. Það þýðir ekkert að slaka á og gefast upp af því að einhverjir á einhverjum tímapunkti eru komnir fram úr þér, það eru líka einhverjir fyrir aftan þig sem eru að reyna að ná þér."
"Þetta er ekkert bara spurning um það sem gerist 2025 og hvað verður haustið 2025 heldur á hvaða leið ertu. Það er ekkert hægt sem keppnismaður að leggja bara árar í bát og gefast upp að því að maður horfir á einhverja helvítis töflu og verður fúll yfir því. Það er bara áfram gakk!“
Viðtalið í heild má sjá í spilaranum hér að ofan.
