Matheus Cunha verður ekki með Brasilíu í landsleikjahlénu eftir að hafa meiðst í dramatískum sigri Manchester United gegn Burnley í gær.
Cunha þurfti að koma af velli á 31. mínútu vegna vöðvameiðsla og tók Joshua Zirkzee stöðu hans í liðinu. Staðan var 1-0 þegar Cunha fór útaf og urðu lokatölur 3-2 eftir að Bruno Fernandes gerði sigurmarkið úr vítaspyrnu í uppbótartíma.
Hann hefur dregið sig úr landsliðshópnum en óljóst er hversu lengi hann verður frá. Mögulegt er að meiðslin séu smávægileg en Cunha má samt sem áður ekki taka þátt í Manchester-slagnum þegar Man Utd spilar við Man City 14. september.
Samkvæmt reglum FIFA mega landsliðsmenn sem draga sig úr hóp vegna meiðsla ekki spila á næstu fimm dögum eftir síðasta landsleik í hlénu.
Athugasemdir
