Gústi á hliðarlínunni í Árbænum í kvöld.
„Ég elska að vinna fótboltaleiki, það er ekki flóknara en það. Það var gaman í dag," sagði Ágúst Gylfason sem átti draumabyrjun sem þjálfari Leiknis í kvöld er liðið vann 1-2 sigur á Fylki sólarhring eftir að hann tók við.
Lestu um leikinn: Fylkir 1 - 2 Leiknir R.
„Það er gaman að vera kominn aftur eftir tveggja ára hlé. Ég bjó í 20 ár í Breiðholtinu uppeldisárin og það er gaman að vera kominn og taka við liðinu. Það er mjög kærkomið og ég vona að við getum snúið skútunni við. Við byrjuðum vel í dag. Ég byrjaði í gær klukkan 15:30 fyrir fyrstu æfingu og vil sérstaklega þakka þjálfarateyminu og Nemma sem stjórnuðu þessum leik þó ég hafi verið bakvið tjöldin og reynt að garga eitthvað. Það skilaði okkur þremur stigum í dag sem er gríðarlega mikilvægt fyrir baráttuna sem við erum í."
Þú tókst kannski af mér eina spurningu sem ég ætlaði að forvitnast með. Þú bjóst í Breiðholtinu, en varstu aldrei í Leikni?
„Jú ég spilaði með Leikni í 3. flokki á yngra ári og svo líka í 6. flokki þegar ég tók nokkrar æfingar áður en ég hóf ferilinn fyrir alvöru," sagði Gústi. Þú hefur þá smá taugar til félagsins?
„Já, ég er búinn að horfa á Leiknsivöllinn í langan tíma uppeldisárin, og var í Fellaskóla. Eftir að ég kom sé ég að við erum með fullt af stuðningsmönnum og vinir mínir í kringum þetta sem voru á svipuðu róli og ég. Það er gaman, Leiknir er stolt Breiðholts og við ætlum að gera vel."
Þú tókst við liðinu í gær, ég veit að þú fylgist vel með fótbolta, en vissirðu nöfnin á öllum leikmönnum liðsins í dag?
„Jú nokkurn veginn, eða nei ég kannski lýg því aðeins en allt í góðu. Það er gaman að koma inn svona, og ég fann það strax inni í klefa í gær þegar ég talaði við strákana hvað þetta er ógeðslega gaman. Það er það sem ég hef saknað síðustu tvö árin."
Leikurinn í dag var svolítið erfiður fyrir ykkur?
„Já, Fylkisliðið er frábært og var spáð upp í Bestu-deildina. Þetta var erfið fæðing en það er stundum betra að byrja svona, sýna mikinn karakter. Það var mikið hlaupið í leiknum og barist og það er það serm skilaði okkur sigrinum. Auðvitað þurftum við að verjast stóran hluta af seinni hálfleik. Við vorum komnir í góða stöðu en gáfum aulamark á okkur úr föstu leikatriði. Heilt yfir tökum við þessi þrjú stig allan daginn og erum bara sáttir við það."
Þið settuð mögulega Íslandsmet með að fá spjald fyrir að tefja á 25. mínútu?
„Já, það er eins og það er," sagði Gústi og hló. „Við komumst svo í 2-0 förum að reyna að verja okkar hlut og það skilaði marki á móti okkur. En ég sá rosalega marga góða hluti hjá Leiknisliðinu í dag, það var eitthvað af slæmum hlutum líka en við þurfum að laga það í framhaldinu. Mótið er rétt byrjað og 16 leikir eftir. Nú fáum við heimaleik næst á móti Völsung og það verður gaman að taka á móti þeim og fá fullt af fólki á völlinn."
Nánar er rætt við Gústa í spilaranum að ofan þar sem hann hrósar liðsheildinni og þjálfarateyminu enn frekar. Hann ræðir um frekari liðsstyrk og meðal annars leikmenn sem þegar eru komnir og var dularfullur í svörum þar.
Athugasemdir
