„Mér finnst frábært að vera byrjaður að spila aftur. Ég er sigurvegari og þess vegna er ég vonsvikinn með úrslitin. Við hefðum getað fengið stig úr þessum leik, þeir voru ekki mikið betri en við en á endanum voru það einstaklingsgæðin sem töldu," sagði Gary að leikslokum.

Hann komst nálægt því að jafna leikinn undir lok fyrri hálfleiks en brenndi af góðu færi.

„Þetta er var dauðafæri, en svona er þetta þegar maður er ekki búinn að spila fótbolta í sex vikur. Hann hefði líklegast endað í netinu ef ég hefði verið búinn að spila eitthvað af viti í sumar. Ég hefði átt að skora en þetta klúður er ekki ástæðan fyrir því að við töpuðum í dag."

Gary gat valið á milli nokkurra liða á Íslandi eftir misheppnaða dvöl hjá Val fyrri part sumars. Það eru nokkrar ástæður fyrir því að hann valdi ÍBV.

„Ég kom hingað til að skora en í dag klúðraði ég tveimur færum. Okkur vantar sigurvegara, menn sem þrá að vinna. Ég geri mitt besta fyrir félagið, það er allt sem ég get gert.

„Ég valdi ÍBV því ég vildi ekki vera áfram í Reykjavík eftir það sem gerðist. Ég vildi ekki halda áfram að rekast á fólk, fyrrverandi liðsfélaga og aðra sem samþykkja ekki alvöru ástæðuna fyrir brottförinni.

„Hérna er hver einasti leikur eins og úrslitaleikur og ég þarf að leggja mig allan fram og halda einbeitingu. Ég hefði auðveldlega getað farið til annars félags en þá hefði ég kannski ekki verið 100% einbeittur. Mig vantaði að fara til félags þar sem ég er mikilvægur og þarf að leggja allt í sölurnar í hverjum leik."

Gary var að lokum spurður hvernig honum liði með hvernig var komið fram við hann hjá Val og hann sagðist ekki erfa neitt við neinn þar.

„Ég erfi þetta ekki við neinn hjá Val. Ég á góða vini þar og ber enn virðingu fyrir Óla jó sem þjálfara. Þetta var bara röng tímasetning og setti mig í slæma stöðu. Ég var ekki ánægður þegar þetta var að gerast."