Brentford setti sig í samband við ástralska stjórann Ange Postecoglou áður en það réði Keith Andrews til starfa.Athletic greinir frá þessu í kvöld.
Tottenham lét Postecoglou taka poka sinn þrátt fyrir að hafa unnið Evrópudeildina og komið liðinu í Meistaradeild Evrópu fyrir næstu leiktíð, en árangur liðsins í ensku úrvalsdeildinni er það sem varð honum að falli.
Lundúnafélagið sótti Thomas Frank frá Brentford, sem gerði síðan heiðarlega tilraun að því að fá Postecoglou í stað hans.
Athletic segir að Brentford hafi sett sig í samband við Postecoglou.
Postecoglou var einn af mörgum á lista Brentford og ræddi Ástralinn við Phil Giles, yfirmann íþróttamála hjá félaginu, en hann var hins vegar aldrei boðaður í formlegt viðtal.
Á endanum var Andrews ráðinn. Hann hafði séð um föstu leikatriðin hjá Brentford síðasta árið og mjög vel liðinn innan félagsins.
Ítalinn Francesco Farioli, sem stýrði Ajax á síðustu leiktíð, kom einnig til greina í starfið en hann er nú tekinn við Porto í Portúgal.
Athugasemdir
