Úrúgvæski framherjinn Luis Suarez verður frá næstu fjóra mánuði eftir að hafa meiðst gegn Atlético Madrid í undanúrslitum spænska Ofurbikarsins.

Suarez fór undir hnífinn og missir líklega af restinni af tímabilinu en Barcelona er þegar farið að skoða í kringum sig.

Samkvæmt Goal.com er félagið að skoða Martinez hjá Inter og Carlos Vela, leikmann Los Angeles FC í MLS-deildinni. Martinez er 22 ára gamall en hann hefur skorað 15 mörk í 24 leikjum með Inter á þessari leiktíð.

Vela varð bandarískur deildarmeistari með Los Angeles FC og besti maður deildarinnar en mexíkóski sóknarmaðurinn gerði 38 mörk í 36 leikjum á síðasta tímabili.

Hann þekkir vel til á Spáni enda lék hann með Real Sociedad áður en hann fór til Bandaríkjanna.

Vela þykir líklegri og ódýrari kostur en Martinez er með 111 milljón evra klásúlu í samning sínum.