Memphis Depay var markahæsti leikmaður í sögu hollenska landsliðsins fyrir landsleikjahléð. Hann var einnig jafn Wesley Sneijder sem stoðsendingahæsti leikmaður sögunnar með 33 stoðsendingar.
Hollendingar unnu 4-0 gegn Finnlandi um helgina þar sem Memphis skoraði eitt mark í leiknum og gaf tvær stoðsendingar, sem gerir hann að stoðsendingahæsta leikmanni landsliðssögunnar.
Memphis er 31 árs gamall og leikur fyrir Corinthians í Brasilíu, en á ferlinum hefur hann leikið fyrir PSV Eindhoven, Manchester United, Lyon, Barcelona og Atlético Madrid.
Hann er með 53 mörk og 35 stoðsendingar í 105 landsleikjum. Til gamans má geta að Memphis hefur tvívegis mætt Íslandi á landsliðsferlinum, einu sinni í 0-1 tapi á heimavelli 2015 og svo gaf hann stoðsendingu í 4-0 sigri í æfingalandsleik í fyrra.
Fyrir þá sem ekki vita þá er Memphis Depay einnig tónlistarmaður.
Athugasemdir
