Hólmar Örn Eyjólfsson leikmaður Vals fékk að líta rauða spjaldið seint í uppbótartíma í kvöld þegar liðið hans gerði 3-3 jafntefli við KR.
Lestu um leikinn: KR 3 - 3 Valur
„Þetta er auðvitað gríðarlega svekkjandi, að fá þetta mark á okkur í lokin sem voru bara því miður mistök af hálfu dómarans. Það er gríðarlega svekkjandi."
KR byrjaði leikinn betur en Valur óx inn í leikinn eftir að leið á fyrri hálfleikinn. Hólmar var samt ekki alveg sammála því að þeir vöknuðu ekki fyrr en á 30. mínútu.
„Við vorum alltaf hættulegir og sköpuðum fullt af færum. En á köflum hefðum við mátt spila betur."
Atvikið þegar Hólmar fær sitt annað gula spjald og KR fær víti er heldur betur umdeilt. Hólmar var alls ekki sammála þeim dóm.
„Það er aukaspyrna utan af kanti og bara svona klassískt. Hann stendur inn fyrir og ætlar að blokka mig, og gerir það. Við hlaupum á hvorn annan, hann dettur síðan ofan á mig og ég hélt hann væri að dæma aukaspyrnu fyrir okkur. En hann dæmir síðan víti og rautt, eina sem leikmaðurinn er að gera er að reyna blokka mig, hann er ekki einu sinni að reyna að fara inn í. Svo er þetta líka góðan meter fyrir utan teig. Þannig þetta er bara gríðarlega svekkjandi."
Viðtalið má sjá í heild sinni í spilaranum hér fyrir ofan.
