Alves snéri aftur til Börsunga undir lok síðasta árs og gerði samning út þessa leiktíð.

Hann er 39 ára gamall og er að halda sér í formi fyrir HM sem fer fram í Katar undir lok ársins.

Þrátt fyrir aldur hefur Alves staðið sig vel hjá Börsungum og spilað 16 leiki í öllum keppnum. Hann hefur þá skorað 1 mark og lagt upp 4 á þessum tíma og hjálpað Barcelona að ná 2. sæti deildarinnar.

Alves hafði ekkert heyrt í Barcelona í apríl og var útlit fyrir að hann myndi yfirgefa félagið í sumar en nú er staðan önnur. Það eru miklar líkur á því að hann verði áfram hjá félaginu og spili fram að HM í Katar.

Hann gerir sér miklar vonir um að vera í brasilíska hópnum en eftir mótið ætlar hann að leggja skóna á hilluna.

Alves er titlaóður og hefur enginn leikmaður unnið fleiri titla en hann. Það er hins vegar einn titill sem hann er ekki með í safninu og er það sjálfur heimsmeistaratitillinn.