Haaland er aðeins 19 ára gamall en er samt farinn að stela fyrirsögnunum hjá stærstu íþróttatímaritum heims. Hann skoraði 28 mörk í 22 leikjum með austurriska liðinu RB Salzburg á þessu tímabili áður en hann samdi við Borussia Dortmund í janúar.

Hann hélt uppteknum hætti í Þýskalandi og er kominn með 13 mörk í aðeins 12 leikjum en Rivaldo hefur miklar mætur á honum.

„Hann er nú þegar orðinn frábær leikmaður en hann er aðeins 19 ára og gæti orðið betri í framtiðinni og jafnvel einn besti framherji heims," skrifaði Rivaldo á Betfair.

„Sumir eru þegar farnir að bera hann saman við leikstíl Ronaldo Nazario og það er margt svipað með þeim. Hann er fljótur, óttalaus og skorar mikið en það er of snemmt að halda að hann taki við keflinu af honum."

„Ronaldo vann HM tvisvar og spilaði á fjórum mótum. Hann heillaði alllan heiminn með hlaupum sínum og mörkum þannig við þurfum smá tíma til að sjá hvort Haaland náði sömu hæðum en hann er með gæðin til að komast nálægt þessum fyrrum liðsfélaga mínum," sagði hann ennfremur.