Brighton hefur lagt fram formlegt 20 milljóna punda tilboð í Wesley Franca, leikmann Flamengo í Brasilíu.
Telegraph greinir frá því að Wesley, sem er 21 árs gamall hægri bakvörður, sé afar eftirsóttur.
Chelsea og Manchester City hafa bæði verið sögð á eftir honum, en það er Brighton sem hefur ákveðið að rífa í gikkinn og leggja fram 20 milljóna punda tilboð.
Wesley spilaði í fræknum 3-1 sigri Flamengo á Chelsea á HM félagsliða á dögunum, en mótið er góður gluggi fyrir Evrópuliðin til að skoða öfluga leikmenn sem spila í öðrum heimsálfum.
Talið er að Flamengo sé reiðubúið að selja Wesley í sumar og að hann hafi sjálfur mikinn áhuga á að fara til Evrópu.
Wesley spilaði fyrstu A-landsleiki sína með Brasilíu í mars á þessu ári og var þá í hópnum sem mætti Paragvæ fyrr í þessum mánuði.
Athugasemdir
