„Mér fannst við góðir í þessum leik, og vorum með gott hugarfar," sagði Heimir Guðjónsson þjálfari FH eftir 2-0 sigur gegn Vestra í dag.
Lestu um leikinn: FH 2 - 0 Vestri
„Við vorum að spila á móti vel skipulögðu og öguðu Vestra liði. Það sem að skiptir máli er að skora fyrsta markið, og við gerðum það. Eftir það fannst mér þetta aldrei spurning, og við vorum í sjálfu sér klaufar að skora ekki fleiri mörk."
FH heldur hreinu í dag, og voru í raun aldrei líklegir til að fá mark á sig í leiknum.
„Við endurheimtum Ísak, hann kom inn í vörnina í dag í fyrsta skiptið í byrjunarliðið. Mér fannst hann frábær, góður karakter og leiðtogi, spilaði vel fyrir okkur og lætur gott af sér leiða til annara leikmanna. Svo fannst mér eftir að við skoruðum fyrsta markið, þá fannst mér við bara spila vel út á velli. Ótrúlegt að Einar Karl skyldi ekki skora, hann skaut í sjálfan sig og í slánna," sagði Heimir.
FH hefur gengið illa á gervigrasi, en Heimir segist ekki vita hver ástæðan er þar.
„Ef ég vissi ástæðuna, þá væri ég ríkur maður. Við þurfum að finna einhverjar lausnir á þessu, og átta okkur á því að fótbolti er líka spilaður á gervigrasi á Íslandi. Við þurfum að fara fá úrslit þar, við gerðum það 2023, og 2024. Við þurfum að ná því til baka," sagði Heimir.
Viðtalið má sjá í heild sinni í spilaranum hér fyrir ofan.
