„Mér fannst við vera með fulla stjórn á leiknum, nánast frá fyrstu mínútu," sagði Sigurður Bjartur Hallsson leikmaður FH eftir 2-0 sigur á Vestra í dag.
Lestu um leikinn: FH 2 - 0 Vestri
„Við leyfðum þeim að hafa boltann og í raun og veru stýrðum leiknum þannig, og beittum skyndisóknum. Mér fannst þeir ráðalausir þegar þeir þurftu að stýra leiknum," sagði Sigurður.
Sigurður skoraði fyrsta mark leiksins, en það var af dýrari gerðinni. Hann segir að þetta gæti verið með betri mörkum sem hann hefur skorað á ferlinum.
„Þetta er með þeim, þetta er klárlega með þeim. Líklega besta markið," sagði Sigurður en fagnaðarlætin hjá liðsfélögunum voru slík að þeir trúðu ekki hvað hafði gerst.
„Þeir þurfa greinilega að hafa meiri trú á mér," segir Sigurður og hlær.
Eftir að FH skoraði þetta fyrsta mark, þá var sigurinn í raun aldrei í hættu.
„Mér finnst þetta vera lenskan þegar við komumst yfir á Kaplakrika, það er rosalega erfitt að komast til baka gegn okkur. Við erum góðir í að loka leikjunum, það er bara einn leikur þar sem við höfum fengið á okkur mark. Það var á móti KR, og við vorum hálfan leikinn einum færri.
Þannig það er ógeðslega erfitt að spila á móti okkur. Við þurfum bara að finna leið til að spila eins á útivelli. Því við erum geðveikt góðir hérna á heimavelli," sagði Sigurður.
Viðtalið má sjá í heild sinni í spilaranum hér fyrir ofan.
