Evrópa í dag - Ísak í umspili um sæti í Bundesliga

Dusseldorf heimsækir Bochum í umspilsleik um síðasta lausa sætið í Bundesliga.

Dusseldorf vann sér inn þátttökurétt með að enda í þriðja sæti í 2. Bundesliga, sem er næstefsta deild, á meðan Bochum endaði í þriðja neðsta sæti í Bundesliga.

Fyrri leikurinn fer fram í kvöld og verður leikinn á heimavelli Bochum en seinni leikurinn verður spilaður í Dusseldorf á mánudagskvöldið.

Ísak Bergmann er mikilvægur hlekkur í leikmannahópi Dusseldorf og mun án nokkurs vafa koma við sögu í kvöld ef ekkert amar að.

Cagliari og Fiorentina eigast þá við í Serie A, efstu deild ítalska boltans, þar sem lokaumferðin fer af stað í kvöld.

Fiorentina getur tryggt sér sæti í Sambandsdeild Evrópu með sigri gegn Cagliari, sem er þegar búið að bjarga sér frá falli og spilar því einungis upp á stoltið.

Bundesliga:
18:30 Bochum - Dusseldorf

Serie A:
18:45 Cagliari - Fiorentina