Valur og Víkingur R. mættust í þriðju umferð A-riðils Reykjavikurmóts kvenna í dag. Valur var fyrir leikinn með þrjú stig eftir tvær fyrstu umferðirnar og Víkingur á botninum án stiga.

Leikurinn hófst klukkan 17:15 í Egilshöll og var staðan 2-0 í hálfleik fyrir Val. Elín Metta og Thelma Björk með mörkin.

Hlín Eiríksdóttir skoraði svo þriðja mark Vals á 52. mínútu. Valur gerði þrefalda skiptingu á 61. mínútu og var Guðrún Karítas ein af þeim sem kom inn á. Guðrún skoraði sitt fyrsta mark á 79. mínútu og bætti við því öðru á 82. mínútu.

Það var svo varamaðurinn Diljá Ýr Zomers sem skoraði sjötta og síðasta mark leiksins á fyrstu mínútu uppbótartíma. Valur er því með sex stig eftir þrjár umferðir. Upplýsingar um markaskorara fengnar af fésbókarsíðu Vals.

Næsti leikur í riðlinum fer fram á morgun þegar Fylkir mætir Þrótti í Egilshöll.