Þeir Gaber Dobrovoljc og Bryan Van Den Bogaert verða ekki með KA á næsta tímabili. Þetta hefur komið fram í hlaðvarpinu Bolurinn þar sem mikið er fjallað um fótbolta á Norðurlandi.
Samningar þeirra renna út í lok árs.
Samningar þeirra renna út í lok árs.
Van Den Bogaert er þrítugur vinstri bakvörður frá Belgíu sem gekk í raðir KA fyrir tímabilið og lék alls 22 deildarleiki í sumar og þrjá bikarleiki. Hann kom frá RWD Molenbeek í Belgíu, liði sem spilar í næstefstu deild.
Dobrovoljc er 29 ára miðvörður sem fenginn var inn þegar Oleksii Bykov, sem var hjá KA fyrri hluta tímabils, sneri heim til Úkraínu eftir að hafa verið á láni hjá KA.
Dobrovoljc er Slóveni sem kom við sögu í níu leikjum með KA. Hann kom frá NK Domzale í heimalandinu, liðið spilar í efstu deild og endaði í sjötta sæti á síðasta tímabili.
Vinstri bakvörðurinn Birgir Baldvinsson skrifaði undir nýjan samning við KA fyrr í þessum mánuði og mun hann væntanlega að einhverju leyti fylla það skarð sem Van Den Bogaert skilur eftir sig. Birgir var á láni hjá Leikni á liðnu tímabili.
Athugasemdir