Glasner stýrði Palace til sigurs í FA bikarnum í maí síðastliðnum.
Oliver Glasner þjálfari Crystal Palace svaraði spurningum eftir tap á heimavelli gegn Manchester United í dag.
Palace tók forystuna með marki úr vítaspyrnu í fyrri hálfleik en fékk tvö mörk á sig eftir aukaspyrnur í síðari hálfleik.
„Við getum fundið margar afsakanir. Við getum talað um þreytuna, breytinguna á byrjunarliðinu á milli leikja, það eru margar afsakanir en þegar allt kemur til alls þá var frammistaðan okkar frekar góð í dag," sagði Glasner.
„Man Utd hefur spilað helmingi færri leiki heldur en við á þessu tímabili og þetta er sárt tap fyrir okkur en við drögum vonandi lærdóm af þessu. Ég vil ekki tala um færin sem við klúðruðum í fyrri hálfleik."
Sigurmark Rauðu djöflanna kom eftir stutta aukaspyrnu rétt utan teigs, þar sem varnarmenn og markvörður Palace virtust ekki vera tilbúnir.
„Ef við þurfum meira en eina mínútu til þess að skipuleggja vörnina til að verjast aukaspyrnu þá er það okkur að kenna. Við verðskulduðum að vera með forystuna í hálfleik og svo voru þetta bara smáatriði sem skiptu sköpum. Ég man ekki hvort United hafi fengið marktækifæri úr opnum leik en þeir voru mjög góðir úr föstum leikatriðum og þess vegna töpuðum við."
Glasner ræddi einnig um leikmannamarkaðinn. Hann er ósáttur með að Palace hafi ekki keypt fleiri leikmenn inn síðasta sumar.
„Við misstum af nokkrum tækifærum í júlí og ágúst til að næla í leikmenn sem hefðu hjálpað okkur að höndla leikjaálagið. Við verðum að standa þétt saman og einbeita okkur að því að komast aftur á sigurbraut. Ég held að það sé alltof seint að ætla að bjarga málunum í janúar, þá verðum við búnir að spila helming leikja okkar á tímabilinu.
„Þegar þú spilar í Evrópu í fyrsta sinn í sögu félagsins þá ættirðu að nota pening til að fjárfesta í staðinn fyrir að spara. Við erum samt að gera flotta hluti, við erum í góðri stöðu í deildinni og ennþá með í öllum fjórum bikarkeppnum."
Glasner og stuðningsmönnum Palace kvíður sérstaklega fyrir Afríkumótinu þegar félagið mun missa fjóra leikmenn úr hóp. Ismaïla Sarr, Christantus Uche, Chadi Riad og Cheick Doucouré fara allir á Afríkumótið.
„Við lendum í vandræðum þegar Afríkukeppnina ber að garði en þetta kemur ekki á óvart, við vissum að það myndi gerast. Mér finnst mikilvægt að nýta þessa stund núna til að minnast á mistök sem voru gerð á leikmannamarkaðinum síðasta sumar þegar við misstum af kjörnum tækifærum til að styrkja hópinn."
Athugasemdir
