Úlfarnir klikkuðu á að ná í fyrsta sigurinn er liðið gerði 1-1 jafntefli við Brighton á Molineux.

Heimamenn komust yfir á 21. mínútu leiksins en boltinn barst til Marshall Munetsi í miðjum teignum eftir aukaspyrnu og hamraði hann boltanum í átt að marki. Verbruggen tókst að verja hann í þverslá, en varð fyrir því óláni að fá boltinn í bakið á sér og inn fyrir línuna.

Markið kom aðeins mínútu eftir að Vitor Pereira, stjóri Wolves, fékk rauða spjaldið fyrir að mótmæli.

Georgino Rütter fékk frábært færi til að jafna snemma í síðari hálfleiknum en Sam Johnstone var vandanum vaxinn í markinu og þá gat Jörgen Strand Larsen tvöfaldaði forystuna fyrir Wolves stundarfjórðungi fyrir leikslok en setti boltann í stöng.

Úlfarnir höfðu tvisvar sinnum tekið forystuna á þessu tímabili og glutrað því niður og greinilega var það fast í hausnum á þeim fyrir leikinn í dag því þegar nokkrar mínútur voru til leiksloka jafnaði Jan Paul van Hecke metin með skalla. Hornspyrna var tekin stutt út á Stefanos Tzimas sem kom með fastan bolta á miðjan teiginn sem Van Hecke þrumuskallaði í netið.

Grátlegt hjá Úlfunum sem bíða enn eftir fyrsta sigrinum. Liðið er áfram á botninum með 2 stig en Brighton í 12. sæti með 9 stig.

Villa á skriði

Donyell Malen skoraði tvívegis fyrir Aston Villa sem lagði nýliða Burnley að velli, 2-1, á Villa Park.

Hollendingurinn skoraði fyrra mark sitt á 25. mínútu eftir sendingu frá Boubacar Kamara og bætti síðan við öðru hálftíma fyrir leikslok með föstu skoti eftir stoðsendingu Morgan Rogers.

Franski miðjumaðurinn Lesley Ugochukwu minnkaði muninn fyrir Burnley á 78. mínútu með skalla eftir hornspyrnu en lengra komust nýliðarnir ekki.

Villa komið með tvo sigra í röð og sitja nú í 13. sæti með 9 stig en Burnley í 18. sæti með 4 stig.

Verður Ange látinn taka poka sinn?

Newcastle United vann 2-0 sigur á Nottingham Forest á St. James' Park.

Bruno Guimaraes skoraði fyrra mark Newcastle á 58. mínútu. Dan Burn vann boltann nálægt miðsvæðinu, færði hann á Guimaraes sem skoraði með frábæru skoti fyrir utan teig og yfir Matz Sels í markinu.

Heimamenn fengu vítaspyrnu á lokamínútunum er Elliot Anderson, fyrrum leikmaður Newcastle, braut klaufalega af sér í teignum eftir að hafa misst boltann frá sér. Nick Woltemade skoraði úr vítaspyrnunni sem var hans þriðja deildarmark á tímabilinu.

Newcastle komið upp í 11. sæti með 9 stig en vandræði Forest halda áfram. Ekkert hefur gengið síðan Ange Postecoglou tók við, en liðið er í 17. sæti með 5 stig.

Endurkoma hjá Everton og Palace ekki lengur taplaust

Everton vann 2-1 endurkomusigur á Crystal Palace á Hill Dickinson-leikvanginum í Liverpool og varð um leið fyrsta liðið til að vinna Palace í deildinni á tímabilinu.

Palace hefur litið mjög vel út undir stjórn Oliver Glasner og stefndi allt í að liðið myndi ná í þriðja sigur sinn á tímabilinu.

Daniel Munoz skoraði með skoti upp við nærstöng eftir hraða sókn og stóðu leikar þannig alveg fram að 75. mínútu er heimamenn í Everton fengu vítaspyrnu.

Maxence Lacroix braut á Tim Iroegbunam í teignum og skoraði Iliman Ndiaye úr vítaspyrnunni. Klaufalegt hjá Lacroix og átti þetta eftir að hafa enn meiri áhrif á gestina.

Jack Grealish, sem hefur heldur betur heillað síðan hann kom á láni frá Manchester City, skoraði sigurmarkið á þriðju mínútu í uppbótartíma.

Fyrirgjöfin kom frá hægri inn á teiginn á Beto sem stangaði boltann í átt að marki en Dean Henderson varði meistaralega frá honum. Munoz ætlaði að hreinsa boltanum frá, en hún fór af Grealish og upp í þaknetið.

Sérkennilegt sigurmark en Grealish og Everton kvarta ekki. Stórkostlegur sigur Everton sem kemur sér upp í 7. sæti með 11 stig á meðan Palace er í 5. sæti með 12 stig.

Palace er með 13 stig í 5. sæti á meðan Everton er í 10. sæti með 9 stig.

Wolves 1 - 1 Brighton
1-0 Bart Verbruggen ('21 , sjálfsmark)
1-1 Jan Paul van Hecke ('86 )

Aston Villa 2 - 1 Burnley
1-0 Donyell Malen ('25 )
2-0 Donyell Malen ('63 )
2-1 Lesley Ugochukwu ('78 )

Everton 2 - 1 Crystal Palace
0-1 Daniel Munoz ('37 )
1-1 Iliman Ndiaye ('76 , víti)
2-1 Jack Grealish ('90 )

Newcastle 2 - 0 Nott. Forest
1-0 Bruno Guimaraes ('58 )
2-0 Nick Woltemade ('84 , víti)