Afturelding gerði dramatískt jafntefli við KR á Meistaravöllum fyrr í dag. KR var með eins marks forystu framan af leik, en Afturelding jafnaði úr vítaspyrnu undir lok leiks. KR-ingar svöruðu þá um hæl og komust í 2-1 en Elmar Kári Cogic jafnaði metin á nýjan leik þegar langt var liðið á uppbótartímann.
Elmar mætti í viðtal að leik loknum.
„Þetta er ótrúlegasti leikur sem ég hef spilað, alveg galinn. Skemmtilegt að ná þessu stigi, hvert stig skiptir auðvitað öllu máli. Við förum með jákvæðari hugsun í næsta leik.“
„Ógeðslega mikill karakter í strákunum, góð liðsheild sem við erum með. Það sést að við gefumst ekki upp þar til að lokaflauti. Það sást hér í dag, þrátt fyrir að fá mark á okkur. Það getur hver sem er sokkið niður og hætt en við höldum áfram og náðum að setja mark hér í lokin.“
Afturelding er einu stigi frá Vestra sem er í öruggu sæti, en þeir spila á morgun.
„Hver einasti leikur er ótrúlega mikilvægur. Við erum að spila á móti þessum liðum sem er í neðri hlutanum. Þá þarf bara að vinna alla þessa leiki, við þurfum að hugsa um okkur og gera okkar. Ef við vinnum rest þá höldum við okkur uppi.“
Viðtalið má sjá í heild sinni í spilaranum hér að ofan.
