„Það var erfitt að byrja leikinn svona, lenda strax marki undir," sagði Gylfi Þór Sigurðsson leikmaður Íslands eftir 3 - 1 tap gegn Tyrkjum í Izmir í kvöld.
Lestu um leikinn: Tyrkland 3 - 1 Ísland
„Það gekk vel að komast aftur inn í leikinn, 1 - 1 í hálfleik en svo skora þeir bara frábært mark í stöðunni 2-1. Það er lítið hægt að segja við því. Þetta er erfiður útivöllur og við hefðum verið mjög sáttir ef við hefðum náð í eitt stig í dag."
Ísland fékk tækifæri til að jafna í stöðunni 2-1, var ekki svekkjandi að nýta það ekki?
„Planið var að vera þéttir og verjast vel en nýta okkur skyndisóknir og föst leikatriði. Þeir voru bara mjög góðir, það verður að viðurkennast. Þeir voru betri í dag en við verðum að vera sterkari á heimavelli í næsta mánuði og taka þá þar."
Tyrkir héldu uppteknum hætti frá öðrum heimaleikjum og létu vel í sér heyra í stúkunni. Hvernig var að spila í þessum hávaða?
„Geggjað! Þetta er einn besti útivöllurinn að koma á, Tyrkland, mikil læti og góð stemmning. Því miður var völlurinn ekki stærri. Það hefði verið gaman að vera með 40-50 þúsund manns. Það er frábært að spila hérna. Geggjaðar aðstæður, maður vill spila fyrir framan marga áhorfendur með mikil læti og í góðri stemmningu. Þetta eru kjöraðstæður að spila í. Að heyra alla syngja þjóðsönginn þeirra, byrjunin og upphitunin og svo allur leikurinn, það var geðveik stemmning og gaman að upplifa það aftur."
Hvernig líður þér eftir að spila mikið í tveimur leikjum með stuttu millibili?
„Mér líður mjög vel, ég var frekar slappur í fyrri leiknum svo það fór ekki mikil orka í þann leik. Ég hafði ekki mikinn kraft til að hlaupa. Mér líður nokkuð vel en finn að ég er ekki kominn í toppstand og einbeiti mér að því að vinna í því næstu vikurnar."
Nánar er rætt við Gylfa í spilaranum að ofan. Hann segist hlakka til tveggja heimaleikja í október þar sem hægt verði að hefna fyrir tapið í kvöld.
