Rúnar Már var öflugur í kvöld. Hér tæklar hann Mbappe og í kjölfarið sauð allt uppúr.
Rúnar Már Sigurjónsson, landsliðsmaður í knattspyrnu, var svekktur eftir 2-2 jafntefli gegn heimsmeisturum Frökkum í kvöld en leikurinn fór fram í Guingamp.
Lestu um leikinn: Frakkland 2 - 2 Ísland
Birkir Bjarnason kom íslenska liðinu yfir áður en Kári Árnason bætti við öðru með skalla. Kylian Mbappe var kynntur til sögunnar um miðjan síðari hálfleikinn og hafði hann mikil áhrif á leikinn.
Hann skoraði úr vítaspyrnunni sem jafnaði leikinn en undir lok leiks var mikill hiti milli liðanna og virtist allt ætla að sjóða upp úr en Rúnar kippti sér lítið upp við þetta.
„Ég held að þeir hafi gert meira úr þessu en þetta var. Ég var ekki að fara að hleypa honum neitt, kannski af því þetta gerðist fyrir framan bekkinn þeirra og þetta var þessi leikmaður. Það var einhver æsingur þarna, tók svona minnst eftir því sjálfur þar sem ég lá allan tímann. Gult spjald og áfram gakk," sagði Rúnar við Fótbolta.net
„Gríðarlega svekkjandi að vinna ekki þennan leik. Fyrri hálfleik vorum við mjög flottir og svo koma þeir með sinn sóknarþunga. Sjálfsmark og víti sem ég sá ekki hvernig var en við sýndum hungur og karakter."
Mikil gagnrýni hefur verið á íslenska liðinu undanfarið eftir stórtöp gegn Belgíu og Sviss í Þjóðadeildinni en liðið sýndi í kvöld að þetta er langt frá því að vera búið.
„Við erum á útivelli á móti heimsmeisturunum og það segir kannski sitt. Þessar gagnrýnisraddir eru fljótar að koma og liðið var á HM fyrir ekki svo löngu. Maður virðir allar skoðanir en þetta lið er ekkert búið."
Rúnar hefur fengið tækifæri í síðustu tveimur leikjum og er hann mjög þakklátur fyrir það og nýtir þau vel.
„Mér líður mjög vel og búinn að bíða lengi eftir tækifærinu og það hefur komið í síðustu tveimur leikjum. Það er leikur aftur á mánudaginn sem við erum spenntir fyrir," sagði hann í lokin.
Hægt er að sjá viðtalið í spilaranum hér fyrir ofan.
