Á meðan lykilmenn landsliðsins geta sleikt sólina og notið sín í landsliðsverkefninu í Katar þá eru þeir leikmenn sem berjast um að vera með flugvélinni til Rússlands á næsta ári ákveðnir í að nýta þennan glugga til að sýna sig og sanna.
„Þetta er flott tækifæri fyrir okkur sem hafa spilað minna að fá einhverjar mínútur til að sýna okkur. Svo einnig er hægt að verðlauna þá sem hafa staðið sig frábærlega í gegnum undankeppnina. Þetta er flott verkefni," segir Skagamaðurinn Arnór Smárason.
„Við sem höfum spilað minna komum hingað á aðeins öðruvísi forsendum. Við viljum nýta okkar tækifæri. Ég er vel stemmdur í leikinn gegn Katar."
Líklegt er að Arnór fái spiltíma í vináttuleiknum gegn Katar sem verður á morgun, 16:30 að íslenskum tíma.
Arnór leikur með Hammarby í Svíþjóð og er ánægður með hvernig sér gekk á nýliðnu tímabili.
„Ég byrjaði flesta leiki og það gekk vel, ég skoraði fimm mörk. Við enduðum um miðja deild og náðum besta árangri Hammarby í tíu ár. Það er stígandi í þessu og vonandi gerum við enn betur á næsta tímabili. Það er markmiðið og það er gaman að vera með í því."
Hvernig leikkerfi er liðið að spila og hvar er Arnór í því?
„Við höfum verið að spila 4-1-4-1. Í byrjun tímabils var ég á hægri kanti og svo seinni hlutann inni á miðri miðjunni. Þetta eru stöður sem ég hef mikið verið að spila í gegnum tíðina og kann vel við mig í."
Arnór vonast til að fjölhæfni sín auki möguleikana á að komast til Rússlands.
„Það er jákvætt að geta leyst fleira en eina stöðu. Ef menn lenda í meiðslum og þarf að grípa inn í þá er maður til taks."
Sjáðu viðtalið í heild í sjónvarpinu hér að ofan.
Athugasemdir
