"Þetta er gríðarlegur léttir bara. Við höfum verið að tapa leikjum undanfarið þar sem við höfum átt meira skilið og svo höfum við líka verið bara lélegir," sagði Haraldur Árni Hróðmarsson, þjálfari Grindavíkur, eftir 3-0 sigur gegn Þór í kvöld. Fyrir leikinn hafði Grindavík tapað fimm leikjum í röð.
Lestu um leikinn: Grindavík 3 - 0 Þór
"Ég var ekki að pæla í því sérstaklega að spila einhvern áferðarfallegan fótbolta í dag, sem við gerðum samt á köflum. Þrjú stig voru lífsnauðsynleg fyrir okkur. "
Hvað var hann að gera öðruvísi í dag en í seinustu leikjum? "Það kom mikið sjálfstraust með Ármanni Inga sem við fengum frá ÍA og kunnum við þeim bestu þakkir fyrir þann snilling. Hann spilaði vel. Að öðru leyti fannst mér strákarnir bara klárir. Mér fannst hver einasti leikmaður vera góður. Við æfðum vel og okkur líður vel."
Hvernig metur Haraldur framhaldið í deildinni? "Við erum ennþá í fallbaráttu eins og staðan er núna og erum ekki sloppnir við eitt né neitt. Við erum með fjögur lið fyrir neðan okkur sem þurfa að vera betri en við það sem eftir lifir móts. Við þurfum eitthvað fáránlegt "run" og það þarf margt að gerast til að komast í þessa úrslitakeppni svo fókusinn er ekki þar. Fókusinn er á Leikni á sunnudag. "
Allt viðtalið við Harald má sjá í spilaranum hér að ofan.
